عشان تحكم على تطبيق معين ناجح و أو لا لازم أول تعرف ايش هي المؤشرات اللي تقيسها عند تقييمك للتطبيق. و عشان تحاول تحسن تطبيقك كمان لازم تعرف ايش هي المؤشرات اللي من خلالها تعرف أداء التطبيق و اذا هو في تحسن أو لا لأن بكل بساطة ما يمديك تحسن اللي ما تعرف كيف تقيس أداءه.
للأسف الكثير مننا (سواء مستخدمين، أصحاب التطبيقات، او المستثمرين) يكتفو بقياس عدد التنزيلات فقط ليحكمو على نجاح أو تحسن التطبيق و هذا الشي جدا … جدا خطأ لسببين
- عدد التنزيلات الموجود في متجر قووقل هو مجموع عدد التنزيلات و ليس عدد المستخدمين اللي حاليا عندهم التطبيق. بمعنى أن لو في تطبيق عندهم مليون تنزيل يمكن يكون ٦٠٠ ألف شخص منهم حذفو التطبيق و متواجد حاليا فقط عند ٤٠٠ ألف شخص. بالتالي الرقم اللي تشوفه أوهم لك حاجه خطأ
- عدد التنزيلات لا يعني عدد الأشخاص اللي يستخدمو التطبيق. يمكن التطبيق يكون بالفعل متواجد على مليون جهاز لكن اللي يستخدموه فعليا هو ١٠٠ ألف شخص فقط
عشان كذا في مؤشرات أخرى تعطيك قياس فعلي لأداء التطبيق و هي تنقسم الى ٤ أصناف رئيسية بناء على الجهة المسؤولة عن تحسينها:
- مؤشرات الإستحواذ: التسويق
- مؤشرات الايرادات: تطوير الأعمال
- مؤشرات الإستخدام ( أو الإدمان): إدارة التطبيق
- مؤشرات الإعجاب: إدارة التطبيق
مؤشرات الإستحواذ
تعريف: هذي المؤشرات اللي ترتبط مباشرة بــ عدد المستخدمين و تقلنا هل احنا بالفعل بالطريق السليم في استحواذنا على المستخدمين و لا لا.
الجهة المسؤولة: هذي المؤشرات عادة تكون مهمة للنشاط التسويقي للتطبيق و بالتالي مسؤولي التسويق هم أكثر ناس تهمهم هذي الأرقام.
المؤشرات:
- عدد التنزيلات اليومي – أسبوعي – شهري – سنوي Install count over time: هذا المؤشر بيعطيك نظرة هل التنزيلات في تصاعد و لا تنازل و هل يزيد في موسم معين و ينزل في موسم ثاني. و غير كذا يبين لك تأثير الحملات الإعلانية اللي سويتها في وقت معين على عدد التنزيلات.
كيفية القياس: متجر قووقل يقدم هذي الاحصائيات بالإضافة إلى أدوات التحليل مثل Flurry or Google Analytics - نسبة نمو المستخدمين الطبيعيين Organic user growth rate : المستخدمين الطبيعيين هم اللي ينزلو تطبيقك لحالهم بدون ما يتم توجيههم لك عن طريق إعلان. يهمك ان تكون نسبة الناس اللي ما تحتاج تعرف عنك عن طريق إعلان أعلى من نسبة اللي تنزل تطبيقك بعد ما تشوف إعلان لأن هذا معناته إن تطبيقك الناس جالسين يتكلمو لإصحابهم بشكل كويس (word of mouth) أو ان ترتيبه عالي في قائمة التطبيقات في متجر التطبيقات وشكله و وصفه جذاب.
كيفية القياس: لو استخدمت وسيلة في الأعلان تعطيك أرقام التنزيل عن طريقها ( زي فيسبوك أو تويتر أو اعلانات قووقل)، اطرح هذا العدد من عدد المستخدمين لديك. لو ما استخدمت وسيلة إعلان تعطيك هذي الميزة فـ الحل انك توقف الإعلان فترة و تحسب النسبة هذي و بعدين ترجع الإعلان. - نسبة المستخدمين النشطين الشهريين Monthly Active Users Rate: المستخدم النشط الشهري هو اللي يستخدم تطبيق مرة بالشهر على الاقل. لما يكون عندك مليون مستخدم فهذا ما يعني شي لو النشط منهم مجرد ألف شخص لأن فعليا مو جالس تستفيد الا من الـ ألف النشطين.
كيفية القياس: أدوات التحليل مثل Flurry or Google Analytics
مؤشرات الايرادات
تعريف: هذي المؤشرات اللي ترتبط بشكل مباشر بالأمور المادية بالتطبيق من أرباح و خسائر و تقلنا هل جالسين احنا نطلع فلوس بشكل كويس و لا بشكل سلبي ( بالضبط، مرات صاحب التطبيق يخسر و هو مو عارف )
الجهة المسؤولة: هذي المؤشرات تكون مهمة للمسؤولين عن الـ Monitization للتطبيق أو جزء الـ بزنس من التطبيق
المؤشرات:
- Monthly ARPU: متوسط الدخل من المستخدم الشهري أو Average Revenue Per User.
كيفية القياس: لو عندك مليون مستخدم و تطبيقك الشهر اللي فات مدخل ١٠٠ الف ريال يعني متوسط الدخل من المستخدم الشهري هو ١٠ هللات.
معلومة: متوسط الدخل من المستخدم في التطبيقات هو ٠.١٨ ريال في الشهر - Monthly Churn Rate: معدل نقص المستخدمين للتطبيق الشهري.
كيفية القياس: لو من بداية الشهر إلى نهايته جاك ١٠٠ ألف مستخدم جديد و حذف التطبيق ٣٠ ألف مستخدم يعني انت معدل النقص الشهري عندك ٣٠٪ .
معلومة: المعدل يتراوح ما بين ٨٠٪ للتطبيقات العادية الى ٤٠٪ للتطبيقات الناجحة جدا - User Liftetime: عمر المستخدم في تطبيقك
كيفية القياس: ١ قسمة معدل نقص المستخدمين يعني للمثال اللي فوق ١ قسمة ٣٠٪ يطلع ٣.٣ أشهر هو عمر المستخدم
معلومة: عدد الأشهر يتراوح ما بين شهر للتطبيقات العادية الى شهرين و نص للتطبيقات الناجحة جدا - LTV: قيمة عمر المستخدم أو Lifetime Value.
كيفية القياس: متوسط الدخل من المستخدم الشهري X عمر المستخدم. بالمثال اللي فوق يصير ٠.١٠ x ٣.٣ = ٠.٣٣ هللة.
معلومة: قيمة عمر مستخدم تويتر هيا ٣.٧٥ ريال بينما الفيسبوك تقريبا ٢٢.٥ ريال - CAC or CPI: تكلفة الاستحواذ على المستخدم Customer Acquisition Cost or Cost Per Install.
كيفية القياس: المصاريف اللي تم الصرف عليها لجلب المستخدمين ( تسويق اعلانات فعاليات الخ) قسمة عدد المستخدمين الجدد. مثال لو صرفنا ٥٠ ألف ريال عشان نجيب ١٠٠ ألف مستخدم جديد يعني تكلفة الاستحواذ ٠.٥ ريال.
معلومة: المتوسط عادة من ٣.٧٥ ريال الى ٧.٥٠ ريال لو كان المتسهدف هو السوق العالمي ( يختلف المتوسط حسب الدولة فـ في السعودية ما يقارب ١.٢ ريال ) - LTV to CAC Ratio: تناسب قيمة عمر المستخدم مع تكلفة الإستحواذ. فلو زادت تكلفة الاستحواذ عن قيمة عمر المستخدم فأنت جالس تخسر و انت مو عارف.
كيفية القياس: قسمة LTV على CAC
معلومة: متوسط التناسب عادة يكون قيمة عمر المستخدم ٣ الى ٥ أضعاف تكلفة الحصول عليه
مؤشرات الإستخدام او الإدمان
تعريف: مؤشرات تقيس مدى تعلق المستخدمين بـ تطبيقك
الجهة المسؤولة: عادة تهم المسؤولين عن تحديد مميزات التطبيق
المؤشرات:
- مدة الجلسة Session Time: المدة اللي يقضيها المستخدم في تطبيقك قبل ما يقفله. يهمنا دايما انه يجلس أطول وقت ممكن داخل التطبيق. الجلسات القصيرة تدل على سرعة الملل من تطبيقك
كيفية القياس: أدوات التحليل مثل Flurry or Google Analytics - متوسط عدد الشاشات التي تم زيارتها كل جلسة: زيادة العدد تدل على اهتمام المستخدم بالتطبيق و تشعبه فيه. لما يكون العدد شاشة وحده فقط فيعني أغلب الأوقات يا أن الشاشات الاخرى غير مهمه أو ما يعرف عنها المستخدم.
كيفية القياس: أدوات التحليل مثل Flurry or Google Analytics
مؤشرات الإعجاب
تعريف: هذي المؤشرات تدل على مدى رضا و سعادة المستخدم من تطبيقك
الجهة المسؤولة: عادة تهم المسؤولين عن تحديد مميزات و تصميم التطبيق
المؤشرات:
- التقييم: تقييم التطبيق في متجر التطبيقات
كيفية القياس: عن طريق متاجر التطبيقات - عدد مرات مشاركة التطبيق في شبكات التواصل: كم مرة تمت مشاركة تطبيقك في شبكات التواصل زي توتير او الفيسبوك
كيفية القياس: يمديك تقيس الرقم هذا عن طريق عمل وسيلة لمشاركة التطبيق و قياس عدد الضغطات لزر المشاركة. - Rate message conversation rate : نسبة المستخدمين اللي يتجاوبو مع طلبك بـ تقييم التطبيق
كيفية القياس: عرض رسالة تدعو فيها المستخدم لتقييم تطبيقك في المتجر و من ثم حساب نسبة اللي ضغطو (موافق) و نسبة اللي قررو ( - التأجيل او الرفض).