أهم ٤ عوامل تأثر في تكلفة تطوير التطبيقات

لما تبغى تسوي تطبيق،  أكيد أحد أهم العوامل اللي بتفرق معك هي التكلفة. “كم راح يكلفني هذا المشروع ؟“ لأن بناء عليه بتعرف لو عائد استثمارك هذا مجدي أو غير مجدي و بناء على الشي هذا ممكن تستمر و ممكن تهون. ما راح اتكلم عن “كم سعر التطبيق” لأن تحديد سعر لتطبيق مجهول هي بالضبط زي محاولة تحديد قيمة x في معادلة متعددة المتغيرات و بدون أي دوال مساعدة ( يعني إنسى من النهاية ). لكن راح اتكلم عن حاجة ممكن تساعدك بشكل كبير و اللي هيا ايش العوامل اللي تأثر في التكلفة. لو عرفت العوامل، راح تكون بيدك القدرة على التحكم بالتكلفة من رفع او خفض. 

عشان نعرف ايش العوامل اللي تأثر في سعر التكلفة، خلونا أول كيف يتم حساب تكلفة سعر التطبيقات.

حساب التكلفة تكون بحساب ساعات العمل المطلوبة لتطوير التطبيق. طبعا الساعة له قيمة ( تختلف من شركة لشركة و من مطور لمطور باختلاف القدرات و الخبرات) و بالتالي عادة تكلفة سعر التطبيق تكون عدد ساعات العمل x قيمة الساعة.

طيب … ايش الاشياء اللي تخلي عدد ساعات العمل كثيرة ؟ ٤ عوامل أساسية

١- عدد المنصات

تبغى تسوي التطبيق فقط على الـ iOS ؟ و لا كمان على الــAndroid  ؟ تبغا كمان تسويله موقع ؟

طبعا كل ما زاد عدد المنصات تزداد تلقائيا التكلفة و بنسبة من ٨٠ الى ١٠٠ بالمئة تقريبا من تكلفة سعر المنصة الأولى ( في حالات ممكن يكون ١٢٠٪ )

مثال: سعر تطبيق الـ iOS ٢٠ الف (بدون تصميم أو تطوير قواعد بيانات)… إضافة تطبيق Android راح يكون عادة ١٧ الى ٢٢ الف

ليه ؟ لأن عادة (لو التطبيق كان native ) الكود و البرنامج حق نظام الـ iOS مختلف كليا عن الاندرويد أو الويندوز او الويب. فعادة يكون شخص مختلف يسوي تطبيق الـ iOS و شخص اخر يسوي الـ  Android . فـ ساعات العمل بتكون “دبل” تقريبا لو كنت تحتاج منصتين

٢- البنية التحتية السحابية

يقصد بالجملة العجيبة هذي هي تطوير قواعد البيانات في السحاب ( على خوادم متصلة بالانترنت )  و الـ APIs اللي توصل قواعد البيانات بالتطبيقات. متى نحتاج بنية تحتية سحابية ؟ تقدر تعرف الاجابة بكل بساطة بمعرفة لو يحتاج تطبيقك ان يتصل بالانترنت للحصول على معلومات معينة.

أمثلة للتطبيقات اللي تحتاج البنية التحتية:

  • تطبيق يكون عملية تسجيل دخول للمستخدمين ( الايميل و الباسوورد و معلومات المستخدم تترسل عبر الانترنت لقواعد البيانات حقت التطبيق للتسجيل لأول مرة أو التحقق من أن المستخدم مسجل مسبقا )
  • تطبيقات شبكات التواصل اللي تخلي المستخدمين يتواصلو مع بعض
  • التطبيقات اللي من خلالها تنزل صور أو افلام او تشاهدها اونلاين

امثلة لتطبيقات لا تحتاج بنية تحتية سحابية:

  • آلة حاسبة
  • منبه
  • مستعرض الملفات
  • الالعاب اللي ما يكون فيها تواصل بين اللاعبين او مشاهدة نتائج البعض

ليه ؟ لأن هذي العملية تتطلب ساعات عمل  ممكن تكون أكثر من ساعات عمل تطوير التطبيق نفسه ( في بعض الحالات مو كلها)

وجود البنية التحتية السحابية ممكن يزود ٧٠ الى ١٥٠ بالمئة من تكلفة التطوير لو احتسبنا ان المشروع عبارة عن تطبيق لمنصة واحده فقط

٣- تصميم الواجهات

نقطة مهمة للأسف مهملة من قبل الكثير من المطورين و شركات التطوير بالمنطقة و هي التصميم.

مهملة لأن بعض المطورين و بعض شركات التطوير عشان تقلل تكلفتها تكون تتغاضى عن مرحلة التصميم و ما تهتم فيه و بالتالي التطبيق اللي تسويه يعمل بالضبط الاشياء اللي العميل طلبها (و بالتالي سوو اللي العميل طلبه) و لكن بشكل و هيئة بشعة و قابلية إستخدام معقدة.

تصميم الواجهات من UI و UX يعتبر تكلفة اضافية مو سهلة لأن تواجد المصممين  المختصين بالواجهات بالعالم قليل جدا ( و بالعالم العربي نادر ) و بالتالي فسعرهم عالي نسبيا.

إضافة تصميم للتطوير تطبيق على منصة واحده يكلف ما بين ٢٠ الى ٥٠ بالمئة من سعر التطبيق

٤- المميزات الأساسية للتطبيق

هنا الدسم. هذا العامل اللي ممكن يطلع بالسعر فوووق و ممكن ينزله تحت بشكل كبير. اللي اقصده بـ كلمة “مميزات” هو الـ features او الأعمال اللي يسويها التطبيق. أمثلة:

  • يحتوي على مشغل ملفات صوتية
  • ينزل ملفات من الانترنت
  • متصفح للـ pdf
  • يتيح امكانية تسجيل الدخول
  • ياخذ موقع المستخدم الحالي
  • يستخدم الخرائط
  • يحتوي على نظام دردشة لحظي chat ( و هذي طبعا تحتها مميزات كثير )
  • فيه خاصية اضافة التعليقات
  • …. الخ

طبعا التطبيقات عادة يكون عبارة عن مجموعة من المميزات. بعضها بسيط و بعضها معقد و صعب التنفيذ. طبعا التكلفة تزداد مع طول القائمة و صعوبة المميزات

كيف تعرف لو عندك ميزة بتكون مكلفة ؟ الطريقة الادق هو بتخاطبك مع ناس مختصة بمجال التطبيقات و لكن في قاعدة بسيطة تزبط معظم الأوقات و اللي هي:

المميزات المنتشرة بكثرة بالتطبيقات عادة تكون سهلة. كل ما قل انتشار الميزة كل ما زادت احتمال انها صعبة التنفيذ


هذه القائمة لأكثر عوامل تأثر في تكلفة تطوير التطبيقات … طبعا في عوامل أخرى بس ما تأثر بشكل كبير أو ما تحتاجها عادة و هيا:

  • اضافة الــ  Animation بشكل كبير في التطبيق
  • رسوم تحليل التطبيق و عمل مستند تخطيطي لآلية عمل التطبيق داخليا ( عادة الشركات الكبيرة تسوي كذا )
  • رسوم ضمان الجودة و اختبار البرمجيات ( كثير من الشركات يضيفوها مجانا )
  • صيانة التطبيق

تحياتي 

تعليق ؟